کروڑوں دلوں پر حکمرانی کرنے والے ہالی ووڈ سپر اسٹار جیکی چن کی بیٹی ایتا این جی بھیک مانگنے اور سڑکوں پر رہنے پر مجبور ہوگئی ہیں۔

بین الاقوامی میڈیا کے مطابق  جیکی چین کی 18 سالہ بیٹی ایتا این جی نے سوشل نیٹ ورکنگ ویب سائٹ یوٹیوب پر ایک ویڈیو پیغام کے ذریعے بتایا ہے کہ وہ بے گھر ہوگئی ہیں اور سڑکوں پر رہنے پر مجبور ہیں۔ ایتا کی والدہ سابق ملکہ حسن ہانک کانگ رہ چکی ہیں انہوں نے اس بات کا اعتراف کیا تھا کہ ماضی میں ان کے جیکی چن سے تعلقات تھے جس کے نتیجے میں انہوں نے 1999 میں ایتا این جی کوجنم دیا تھا تاہم ایتا اپنے والد کے ساتھ نہیں رہتیں۔

ویڈیو پیغام میں این جی  کہتی نظرآرہی ہیں ’’ میں جیکی چین کی بیٹی ہوں اور میں بے گھر ہوں، گھر نہ ہونے کی وجہ سے میں اپنی ایک دوست کے ساتھ ایک پل کے نیچے سونے پر مجبور ہوں۔ ویڈیو میں موجود ان کی دوست نے کہا کہ انہوں نے اپنے دوستوں، اور گھروالوں سے مدد کرنے کا کہا ہے اس کے علاوہ پولیس اور اسپتال بھی گئی ہیں لیکن کوئی بھی ہماری مدد کرنے کو تیار نہیں ہے۔  یہاں تک کہ کوئی ہمارے فون کا بھی جواب نہیں دے رہا۔سارے راستے محدود ہونے کے بعد ہم ویڈیو بنانے پر پجبور ہوئے ہیں، ہمیں سمجھ نہیں آرہا کہ ہم کیا کریں۔

واضح رہے کہ ایتا این جی نے ماضی میں اپنے اور جیکی چن کے رشتے سے متعلق کہا تھا کہ ان کے والد کی ان کی زندگی میں کوئی اہمیت نہیں ہے یہاں تک کہ وہ ان کے لئے اس دنیا میں موجود نہیں ہیں، میں نے کبھی جیکی چن کو اپنا باپ نہیں مانااور نہ کبھی انہیں باپ کہا، میں صرف انہیں ایک اداکار سمجھتی ہوں۔